नवी दिल्ली : मोठा निर्णय घेत BCCI ने चेतन शर्मा यांच्या अध्यक्षतेखालील निवड समिती बरखास्त केली आहे. बीसीसीआयने 28 नोव्हेंबरपर्यंत निवडकर्ता पदासाठी नवीन अर्ज मागवले आहेत. बीसीसीआयने निवडकर्त्यांना अनेक कठीण प्रश्न विचारले, जे त्यांना काढून टाकण्याचे कारण ठरले. जाणून घेऊया त्या कारणांबद्दल, ज्यांच्यामुळे BCCI ने अचानक संपूर्ण निवड समिती हटवली.

2022 च्या टी-20 विश्वचषक स्पर्धेत भारतीय संघाला चांगली कामगिरी करता आली नाही. टीम इंडियाला उपांत्य फेरीत इंग्लंडविरुद्ध १० विकेट्सने पराभव स्वीकारावा लागला होता. या सामन्यात भारतीय गोलंदाज आणि फलंदाज फारच फ्लॉप दिसले. २०२१ च्या टी-२० विश्वचषकातही विराट कोहलीच्या नेतृत्वाखाली भारताला पाकिस्तानविरुद्ध १० गडी राखून पराभव स्वीकारावा लागला होता.

२०२२ च्या टी-२० विश्वचषकात केएल राहुल वाईटरित्या फ्लॉप झाला. जेव्हा जेव्हा टीम इंडियाला त्याच्याकडून मोठ्या खेळीची अपेक्षा होती तेव्हा तो लवकर बाद होऊन पॅव्हेलियनमध्ये परतला. मोठ्या सामन्यांमध्ये तो अयशस्वी ठरला. 2022 च्या T20 विश्वचषकातील 6 सामन्यात त्याने 128 धावा केल्या आहेत. उपांत्य फेरीच्या सामन्यात त्याच्या बॅटमधून फक्त 5 धावा निघाल्या. खराब कामगिरीनंतरही तो संघात राहिला.

२०२१ च्या टी२० विश्वचषकानंतर विराट कोहलीने भारतीय संघाचे कर्णधारपद सोडले. यानंतर रोहित शर्माने टीम इंडियाची कमान हाती घेतली, पण निवडकर्त्यांनी त्याला महत्त्वाच्या दौऱ्यांवर विश्रांती दिली आणि त्याच्या जागी दुसरा कर्णधार नेमला. दक्षिण आफ्रिका मालिकेत ऋषभ पंत, नेदरलँड मालिकेत हार्दिक पांड्या आणि झिम्बाब्वे दौऱ्यावर केएल राहुलला कर्णधार बनवण्यात आले. इंग्लंडविरुद्ध खेळल्या गेलेल्या एकमेव कसोटी सामन्यातही जसप्रीत बुमराहकडे भारतीय संघाची कमान सोपवण्यात आली होती. गेल्या वर्षभरात निवड समितीने 8 कर्णधारांना आजमावले.

गेल्या वर्षभरात भारताने बहुतांश देशांना भेटी दिल्या. जिथे वेगवेगळी टीम पाठवली होती. झिम्बाब्वे आणि वेस्ट इंडिज दौऱ्यावर पूर्णपणे भिन्न संघ पाठवण्यात आले होते. त्याचवेळी आवेश खान आणि रवी बिश्नोई यांना आशिया चषक स्पर्धेत स्थान मिळाले, पण ते २०२२ च्या टी२० विश्वचषकातून वगळले गेले. आशिया चषक 2022 मध्ये सुपर-4 सामन्यात टीम इंडियाला पाकिस्तान आणि श्रीलंकेविरुद्ध पराभवाला सामोरे जावे लागले आणि टीम इंडिया फायनलमध्येही पोहोचू शकली नाही.

संघात जखमी खेळाडूंची निवड का करण्यात आली?

दक्षिण आफ्रिका मालिकेत जसप्रीत बुमराहचे भारतीय संघात पुनरागमन झाले. पण तो पूर्णपणे तंदुरुस्त नव्हता. तरीही त्याला संघात घेण्यात आले. यानंतर दुखापतीमुळे तो संपूर्ण T20 विश्वचषकातून बाहेर पडला. हर्षल पटेलला संपूर्ण T20 विश्वचषकात एकही संधी मिळाली नाही. हर्षल पटेल पूर्णपणे तंदुरुस्त नव्हता का? यानंतर राखीव खेळाडूंमध्ये निवड झालेल्या दीपक चहरलाही दुखापत झाली. मुख्य निवडकर्ता चेतन शर्मा टीम इंडियाच्या प्रत्येक दौऱ्यावर सोबत होते, पण तेथून त्यांनी नवीन खेळाडूंचा शोध घेतला नाही.