गणेश नाईकांना पुन्हा धक्का; भाजपच्या आजी-माजी नगरसेवक दाम्पत्यांचा राष्ट्रवादीत प्रवेश

महाअपडेट टीम 5 जानेवारी 2021 :-  नवी मुंबईत शिवसेनेनंतर राष्ट्रवादीनेही भाजपला जोरदार धक्का दिला आहे. नवी मुंबई भाजपच्या नगरसेविका दिव्या गायकवाड आणि माजी नगरसेवक वैभव गायकवाड यांनी शरद पवारांच्या उपस्थितीत राष्ट्रवादी काँग्रेसमध्ये प्रवेश केला आहे. या वारंवार होणाऱ्या पक्षप्रवेशामुळे गणेश नाईक यांच्यासाठी मोठा धक्का मानला जात आहे.

नवी मुंबई महानगरपालिका निवडणूक तोंडावर येऊन ठेपली आहे. त्यामुळे कोणत्याही क्षणी निवडणूक लागण्याची शक्यता वर्तवण्यात येत आहे. अशातच दिव्या गायकवाड या मागील निवडणुकीत प्रभाग क्रमांक 64 मधून नगरसेवकपदी निवडून आल्या होत्या.

विधानसभा निवडणुकीपूर्वी राष्ट्रवादीचे दिग्गज नेते गणेश नाईक यांच्यासह गायकवाडांनीही भाजपमध्ये प्रवेश केला होता. मात्र आता गायकवाड दाम्पत्याने पुन्हा राष्ट्रवादीचे ‘घड्याळ’ हाती बांधल्याने राजकीय क्षेत्रात खळबळ उडाली आहे.